Lestu um leikinn: Breiðablik 2 -  1 Virtus

Breiðablik tók á móti AC Virtus frá San Marínó í fyrri leik liðanna í úrslitaeinvígi um sæti í deildarkeppni Sambandsdeildarinnar og lentu heimamenn undir á elleftu mínútu.

Blikar höfðu byrjað leikinn mun betur og fengið nokkur góð færi á upphafsmínútunum en Viktor Örn Margeirsson gerðist sekur um klaufalegt brot innan vítateigs eftir flotta skyndisókn hjá Virtus. Hann braut á Ivan Buonocunto og skoraði Stefano Scappini örugglega af vítapunktinum.

Þetta var í fyrsta sinn sem Virtus fór yfir miðju í leiknum en gestirnir frá San Marínó vörðust vel og voru hættulegir í skyndisóknum. Þeir fengu færi til að tvöfalda forystuna áður en Valgeir Valgeirsson jafnaði fyrir Blika.

Hann skoraði eftir frábæran undirbúning frá Kristni Steindórssyni sem lék á nokkra varnarmenn Virtus áður en hann gaf boltann út á Valgeir. Skot Valgeirs fór af tveimur varnarmönnum áður en hann endaði í netinu, en gestirnir vörðust á köflum með ellefu menn innan eigin vítateigs.

Í upphafi síðari hálfleiks tóku Blikar forystuna þegar Tobias Thomsen skoraði úr vítaspyrnu. Það er VAR-kerfi á vellinum en teymið ákvað ekki að grípa inn í ákvörðun dómarans um að dæma vítaspyrnu þrátt fyrir að endursýningar hafi sýnt að Valgeir fór niður við litla sem enga snertingu.

„Þetta var nú samt aldrei víti, Valgeir fór niður í teignum eins og hann hafi verið skotinn. Það snerti hann enginn. Það er VAR í leiknum en þeir sammælast niðurstöðu dómarans," segir meðal annars í textalýsingu frá leiknum.

Danski dómari leiksins gerði nokkur skrýtin mistök í síðari hálfleiknum en fleiri mörk litu ekki dagsins ljós. Virtus varðist vel og kom Guðmundur Magnússon boltanum í netið í uppbótartíma en ekki dæmt mark vegna rangstöðu eftir langa athugun í VAR-herberginu.

Lokatölur urðu 2-1 og mega Blikar því ekki tapa seinni leiknum í San Marínó.

   21.08.2025 13:00

UTAN VALLAR: Samanburður á fjárhagsstöðu Breiðabliks og AC Virtus