Borussia Dortmund þurfti að hafa fyrir hlutunum er Augsburg kíkti í heimsókn á Westfalen-leikvanginn í Dortmund en heimamenn unnu nauman, 4-3, sigur í stórskemmtilegum leik.

Enski miðjumaðurinn Jude Bellingham kom Dortmund yfir á 29. mínútu eftir sendingu frá Karim Adeyemi áður en Arne Meier jafnaði ellefu mínútum síðar.

Nico Schlotterbeck kom Dortmund aftur í forystu á 42. mínútu en Augsburg svaraði með öðru jöfnunarmarki undir lok hálfleiksins.

Þegar fimmtán mínútur voru eftir skoraði varamaðurinn Jamie Bynoe Gittens en vörn Dortmund var sofandi eftir fagnaðarlætin og jafnaði David Colina aðeins hálfri mínútu síðar.

Bandaríski sóknartengiliðurinn Giovanni Reyna gerði sigurmark Dortmund þegar tólf mínútur voru eftir og það með stórglæsilegu marki fyrir utan teig. Hann tók boltann á lofti og hamraði honum efst í vinstra hornið.

Sebastien Haller kom inná sem varamaður í fyrsta leik sínum fyrir félagið, en hann greindist með krabbamein stuttu eftir að hann samdi við Dortmund á síðasta ári og hefur síðan þá farið í tvær aðgerðir og þrjár geislameðferðir. Stúkan fagnaði því ákaflega er hann kom inná.

Lokatölur 4-3 fyrir Dortmund sem er í 6. sæti með 28 stig.