Inter er komið aftur á beinu brautina eftir tap í síðustu umferð ítalska boltans.

Stórliðið heimsótti Genoa í dag og var staðan markalaus þar til á 64. mínútu þegar Romelu Lukaku skoraði laglegt mark. Lukaku hefur verið algjör burðarstólpur í liði Inter og er kominn með sjö mörk í sex leikjum það sem af er tímabils.

Stundarfjórðungi síðar innsiglaði varnarmaðurinn Danilo D'Ambrosio sigur gestanna með skalla eftir hornspyrnu.

Inter var við stjórnvölinn í dag og áttu heimamenn í Genoa aðeins eina marktilraun í leiknum, sem rataði ekki á rammann.

Inter er með tíu stig eftir fimm umferðir, tveimur stigum eftir toppliði AC Milan sem á leik til góða gegn Roma mánudagskvöldið.