„Bara svekkelsi, heilt yfir hefðum við viljað gera betur. Mér fannst hlutir í spilamennskunni sem voru ekki upp á tíu í dag og við setjum þá kröfu á okkur sem lið að eiga alltaf okkar besta leik og stíga skref fram á við og mér fannst vanta aðeins upp á það í dag“ sagði Jóhannes Karl Sigursteinsson, þjálfari Stjörnunnar, eftir 1-2 tap gegn Þrótti í dag.
Lestu um leikinn: Stjarnan 1 - 2 Þróttur R.
Leikurinn var úrslitaleikur um það hvort liðið myndi klára mótið fyrir tvískiptingu í efri hluta deildarinnar en Stjörnunni dugði jafntefli. Staðan var 1-1 í hálfleik og var það alveg fram á fyrstu mínútu í uppbótartíma þegar Þróttarar skoruðu sigurmarkið. Aðspurður hvort hann hafi talið sitt lið vera að verja stigið of mikið segir hann:
„Það er náttúrulega alltaf einhversstaðar í huganum að eitt stig hefði dugað en mér fannst það svona, já það má kannski orða það þannig. Mér finnst við fara of fljótt í einhverja langa bolta í staðinn fyrir að halda boltanum innan liðsins og kannski verja þetta eina stig í staðinn fyrir að sækja þrjú.“
Stjarnan endar í neðri hlutanum eftir úrslit dagsins og þurfa þar að spila við þrjú lið sem eru að berjast fyrir lífi sínu í deildinni en fyrir Stjörnuna eru þessir leikir í rauninni hálf tilgangslausir hvernig fer liðið inn á þessa leiki?
„Þetta eru bara þrír leikir þar sem við förum í til þess að vinna en að sjálfsögðu bíður þetta okkur upp á að geta kannski gefið fleiri leikmönnum tækifæri og það eru ungir leikmenn og hungraðir á bekknum og verður bara áhugavert að sjá hvernig þær nýta þær mínútur sem þær fá í þessum leikjum líka.“
Viðtalið má sjá í heild sinni í spilaranum hér að ofan.
