KR-ingar fengu til sín tvo nýja leikmenn í dag. Alex Freyr og Ægir Jarl skrifuðu undir í Frostaskjólinu.
Rúnar Kristinsson, þjálfari KR, ræddi við Fótbolta.net á fréttamannafundi í dag.
Rúnar Kristinsson, þjálfari KR, ræddi við Fótbolta.net á fréttamannafundi í dag.
„Við erum gríðarlega ánægðir með að fá þessa leikmenn. Þeir styrkja liðið fyrir komandi tímabil," segir Rúnar.
„Ægir valdi KR og ég held að það sé mjög gott val hjá honum. Við höfum áhuga á að blanda okkur í þá baráttu að berjast um titilinn. Við viljum komast nær en við gerðum síðasta sumar. Til þess þurfum við að fá inn menn sem eru til í að leggja á sig mikla vinnu og yngja upp leikmannahópinn okkar."
„Fjölnismenn hafa alið upp góða leikmenn undanfarin ár og við getum vonandi gert hann enn betri og hjálpað honum í þeirri vegferð sem hann er í. Það er stundum hollt fyrir menn að breyta um umhverfi og koma á nýja staði og fá nýja áskorun."
Alex hefur verið lykilmaður hjá Víkingum og fróðlegt verður að sjá hann með enn betri leikmenn í kringum sig.
„Það verður mjög áhugavert. Við höfum fylgst með honum lengi og höfðum mikinn áhuga á að fá hann í okkar raðir. Við erum með frekar þunnan hóp og við viljum hafa ólíkar týpur í hópnum. Við viljum sækja okkur fleiri leikmenn, við vorum með of lítinn hóp í sumar."
Fleiri frétta er að vænta af KR á næstunni en viðtalið má sjá í heild í sjónvarpinu hér að ofan.
Athugasemdir
