Spænska félagið Leganes hefur sent frá sér yfirlýsingu þar sem það staðfestir að það hafi fengið neitun frá spænska knattspyrnusambandinu þegar það vildi kaupa sóknarmann í stað Martin Braithwate.

Yfirlýsingin er harðorð og þar gagnrýnir Leganes reglur sambandsins, segir þær ósanngjarnar og að sett sé stórt spurningamerki við heiðarleika spænsku deildarinnar.

Barcelona fékk undanþágu til að kaupa sóknarmann utan félagaskiptagluggans vegna meiðsla í herbúðum liðsins. Félagið nýtti þá riftunarákvæði í samningi Braithwate og fékk hann til sín.

Leganes, sem er í fallsæti og berst fyrir lífi sínu í deildinni, missti þá lykilmann en átti ekki kost á að fylla hans skarð.