Þýski miðjumaðurinn Leon Goretzka er á óskalista Atlético Madríd á Spáni, en félagið hefur lengi haft áhuga á þessum öfluga leikmanni Bayern München.
Goretzka er þrítugur og unnið fimmtán titla með Bæjurum síðan hann kom frá Schalke árið 2018.
Á þessum átta árum hefur hann tvisvar verið valinn í lið ársins í Þýskalandi og í liði ársins hjá UEFA er Bayern vann Meistaradeildina árið 2020.
Florian Plettenberg hjá Sky Sports segir raunverulegan möguleika á að Goretzka sé á leið til Atlético á Spáni, en Diego Simeone, þjálfari Atlético, hefur lengi verið aðdáandi þýska miðjumannsins.
Viðræður Atlético við Bayern eru hafnar og má búast við því að þýska félagið taki ákvörðun um framtíð hans á næsta sólarhringnum.
Goretzka hefur komið við sögu í 28 leikjum með Bayern á tímabilinu og skorað eitt mark.
Athugasemdir
