Frábær byrjun Flick hjá Bayern - Schalke í frjálsu falli

Hans-Dieter eða 'Hansi' Flick tók við þjálfarastarfinu af Niko Kovac síðasta haust og hefur gengi Bayern verið stórkostlegt síðan. Enginn nýr þjálfari Bayern hefur byrjað jafn vel og Flick í 55 ár, enda hefur Bayern unnið 22 af 25 leikjum undir hans stjórn, gert eitt jafntefli og tapað tveimur. Á þessum tíma er liðið búið að skora 80 mörk og fá 16 á sig.

Kovac var rekinn frá Bayern síðasta haust en hann hafði kvartað undan því að leikmannahópurinn væri ekki nægilega góður til að drottna yfir þýsku deildinni. Flick, sem var aðstoðarþjálfari Kovac áður en hann tók við aðalliðinu, er búinn að afsanna það.

Svipaða sögu var hægt að segja um David Wagner hjá Schalke þar sem liðinu gekk afar vel á fyrri hluta tímabils.

Nú hafa hlutirnir hins vegar tekið skarpa beygju á verri veg og er liðið aðeins búið að skora þrjú mörk í síðustu ellefu deildarleikjum.

Í gær átti Schalke heimaleik við fallbaráttulið Werder Bremen og tapaði 0-1. Það var ellefti deildarleikur liðsins í röð án sigurs.

Schalke hefur aðeins náð í fjögur stig úr síðustu ellefu leikjum þrátt fyrir að fimm neðstu lið deildarinnar hafi verið meðal andstæðinga.