Fótbolti.net

þri 21. desember 2004 09:00

Elvar Geir Magnússon

Andriy Shevchenko - AC Milan (4)

Við hér á Fótbolti.net stóðum fyrir kosningu á besta fótboltamanni heims í nóvembermánuði árið 2004. Við birtum svo ítarlegan pistil um hvern og einn leikmann eða einn á dag í desembermánuði í jóladagatalinu okkar.

4. Andriy Shevchenko

Það var þann 29.desember árið 1976 í bænum Dvirkivshchyna í Úkraínu sem Andriy Shevchenko fæddist. Í dag er hann einn allra besti knattspyrnumaður heims og einn mesti markaskorari síðari tíma. Þrátt fyrir að hafa fæðst í þessum smábæ þá eyddi hann æskuárunum að langmestu leyti í Kænugarði. Þegar hann var 9 ára gamall kom Olexandr Shpakov yngri flokka þjálfari hjá Dynamo Kiev auga á hann á móti sem kallast "Leather Ball".

Undir leiðsögn Shpakov vann Shevchenko marga titla. Árið 1990 lék hann með U14 liði Dynamo á Ian Rush bikarmótinu í Wales og þar varð hann markahæsti leikmaður mótsins. Ian Rush sjálfur gaf honum gjöf af því tilefni, fótboltaskóna sína. Síðar áttu þeir Shevchenko og Rush eftir að mætast í Meistaradeild Evrópu þegar sá síðarnefndi var að ljúka ferli sínum hjá Newcastle.

Shevchenko var lánaður í Dynamo-2 sem er dótturlið Dynamo Kiev og lék hann með liðinu 1993, hann var markahæstur með 12 mörk. Í kjölfarið var honum boðið í Ólympíulið Úkraínu og tekinn upp í aðallið Dynamo Kiev. 28.október 1994 þá lék hann sinn fyrsta leik fyrir félagið en það var útileikur gegn Shakhtar Donetsk, Dynamo vann leikinn 3-1 en Shevchenko náði ekki að setja sitt mark á leikinn. Hans fyrsta mark í úkraínsku deildinni kom síðan 1.desember sama ár í 4-2 sigri á Dnipro.

Fyrsti Evrópuleikur Shevchenko var gegn Spartak Moskvu á útivelli 23.nóvember 1994 í Meistaradeildinni en fyrsta mark hans í keppninni skoraði hann 18 ára gamall gegn Bayern Munchen. Hann var farinn að vekja mikla athygli á sér og fékk tækifæri með landsliði Úkraínu, í lok mars árið 1995 lék hann sinn fyrsta landsleik en hann var háður í Zagreb. Landsliðsferill hans byrjaði ekki vel því Úkraína steinlá fyrir Króatíu 0-4.

Það var ekki fyrr en rúmu ári síðar sem hann skoraði sitt fyrsta mark fyrir landsliðið en það var gegn Tyrklandi þann 1.maí 1996. Það mark dugði Úkraínu þó ekki þar sem þeir töpuðu 2-3. Shevchenko var þó kominn á stjörnuhimininn og skaust enn hærra þar árið 1997 þegar hann skoraði þrennu í Evrópuleik gegn Barcelona, Kænugarðsmenn unnu leikinn mjög óvænt 4-0.

Hundraðasta mark sitt skoraði hann 28.apríl 1999 í leik gegn Zirka Kirovohrad í úkraínska bikarnum. Á tíð sinni í úkraínska fótboltanum vann hann fimm meistaratitla og þrjá bikarmeistaratitla. Silvio Berlusconi ákvað að opna budduna sína og keypti Shevchenko til ítalska liðsins AC Milan fyrir háar fjárhæðir, í samningnum var einnig vináttuleikur milli Dynamo Kiev og Milan.

Shevchenko var fljótur að slá í gegn á Ítalíu og mörkin fóru að hlaðast inn. Hundraðasta mark hans fyrir AC Milan kom 23.nóvember í fyrra í deildarleik gegn Chievo en sá úkraínski skoraði bæði mörkin í 2-0 sigri. Í lok tímabilsins hampaði Milan meistaratitlinum og Shevchenko varð markakóngur deildarinnar með 24 mörk. Í lok tímabilsins gaf hann út þá yfirlýsingu að hann vill enda feril sinn með Milan.

Mánudaginn 13.desember hlaut Shevchenko síðan gullknöttinn, hann var krýndur besti knattspyrnumaður Evrópu.

Valeri Lobanovsky yfirþjálfari hjá Dynamo lýsti Shevchenko á eftirfarandi hátt: "Hann hefur allt sem góðan sóknarmann þarf að prýða. Það mikilvægasta er þó tilfinningin fyrir mörkum, hann leggur sig allan fram á æfingum og er sífellt að læra meira og meira."

Shevchenko er martröð varnarmannsins, hann er alltaf í toppformi og margir vilja meina að hann sé hættulegastur á lokamínútunum. Það verður alltaf að hafa auga með honum, þó það sé oftast ekki einu sinni nóg!

Vissir þú þetta um Andriy Shevchenko:
- Áhugamál hans: Pool, tennis og bílar (faðir hans er bílaviðgerðarmaður).
- Fyrirmyndir: Allt lið Dynamo Kiev 1986, Pele, Zico, Platini, Romario.
- Uppáhalds söngvarar: Freddie Mercury og Laima Vaikule.
- Uppáhalds leikarar: Alexander Abdulov og Julia Roberts.
- Uppáhalds kvikmynd: "The goalkeeper"
- Uppáhalds drykkir: Appelsínu og ananas safi.
- Uppáhalds matur: Kjúklingur.