Lestu um leikinn: Þróttur R. 3 -  0 Þór

„Enn einu sinni missum við leikmann út af í fyrri hálfleik, þriðja höfuðhöggið á tímabilinu. Það var sjokk að missa Akseli út. Maður veit ekki hvað maður á að segja við erum búnir að lenda í svo miklum skakkaföllum. Það hafði klárlega áhrif á okkur," sagði Þorlákur Árnason, þjálfari Þórs, í viðtali eftir leik.

Í kjölfarið var hann svo spurður sérstaklega út í ástand Akseli.

„Hann fékk heilahristing og festist í baki við þetta högg; mundi ekki neitt eftir neinu. Hann er ekki í neinni hættu en mikið áfall að missa hann út af í einhverjar vikur."

Aðalbjörn dómari dæmdi ekki brot í atvikinu og tók full langan tíma í að stöðva leikinn.

„Mér fannst það hræðilegt, eitt að það er brot en það er líka bara hætta (ef leikurinn er ekki stöðvaður). Dómarinn var ekki alveg með þetta á hreinu, því miður. Það hefur komið í ljós að þessi höfuðhögg eru stórhættuleg og við erum orðnir sérfræðingar í þessu; þriðji leikmaðurinn í mótinu," sagði Láki.

Akseli er 26 ára Finni sem gekk í raðir Þórs í vetur. Hann hefur byrjað fyrstu sex leiki Þórs í Lengjudeildinni og lék í þrem af fjórum bikarleikjum liðsins. Hann er þriðji miðvörður Þórs sem lendir í meiðslum í upphafi móts, áður höfðu þeir Bjarki Þór Viðarsson og Birgir Ómar Hlynsson lent í meiðslum og var Birgir fjarri góðu gamni í dag. Elmar Þór Jónsson, sem kom inn fyrir Akseli í dag, er að upplagi bakvörður.