Töluverðar breytingar gegn Eistum
Freyr og Erik Hamren á æfingu í Katar í dag.
Siggi Dúlla og Freysi ræða málin.
Freyr Alexandersson, aðstoðarþjálfari íslenska landsliðsins, segir að talsverðar breytingar verði á byrjunarliðinu gegn Eistlandi á morgun frá því í 2-2 jafnteflinu gegn Svíþjóð á föstudaginn. Íslenska liðið hefur dvalið í Katar undanfarna daga og mætir Eistum þar á morgun.
„Það verður töluvert um breytingar á liðinu. Þetta er janúar verkefni og við erum að skoða hvaða leikmenn eru næst A-hópnum og framtíðarleikmenn Íslands. Við gerum breytingar en það verða samt ekki ellefu breytingar," sagði Freyr við Fótbolta.net eftir æfingu íslenska liðsins í dag.
Kristján Flóki ekki með
Kristján Flóki Finnbogason, framherji Start, verður væntanlega ekki með vegna meiðsla sem hann varð fyrir á æfingu fyrir helgi.
„Hann er frábær leikmaður og við vorum spenntir að sjá hann en það sem er mikilvægast nuna er að við hjálpum honum að verða klár fyrir undirbúningstímabilið. Ég hef mikla trú á að Kristján Flóki eigi eftir að gera góða hluti með sínu félagsliði á næsta tímabili," sagði Freyr.
Framtíðar landsliðsmenn
Erik Hamren, landsliðsþjálfari, og Freyr hafa séð marga nýja leikmenn á æfingum í Katar og eru ánægðir með ferðina hingað til.
„Við höfum verið mjög ánægðir. Það eru margir leikmenn sem hafa heillað okkur. Við sjáum hér leikmenn sem verða tilbúnir að spila fyrir A-landsliðið innan tíðar ef þeir taka rétt skref á sínum ferli. Sumir geta kannski spilað fljótlega en aðrir eftir einhver ár."
„Fótboltinn er skrýtinn því þetta gerist svo hratt. Arnór Sigurðsson hefur sannað að það gerist ýmistlegt á einu ári. Allir þessir strákar geta spilað fyrir A-landsliðið á einhverjum tímapunkti. Þeir þurfa að spila rétt úr spilunum sínum, vera þolinmóðir og á sama tíma aggressívir í að ná góðum árangri þar sem þeir eru staddir í dag."
Hér að ofan má sjá viðtalið í heild sinni. Þar fer Freysi meðal annars yfir jafnteflið gegn Svíum og lið Eistlands sem Ísland mætir á morgun.
Athugasemdir
