Barcelona virðist vera með langbesta liðið í fótboltaheiminum í dag en þær gjörsamlega völtuðu yfir alla andstæðinga sína í Meistaradeildinni á tímabilinu nema einn.

Börsungar töpuðu 2-0 gegn Manchester City í fyrstu umferð riðlakeppninnar, en þær hafa unnið alla leikina síðan þá. Þær sigruðu 3-0 á heimavelli gegn Man City í lokaumferð riðlakeppninnar í desember og rúlluðu svo yfir bæði Wolfsburg og Chelsea í útsláttarkeppninni.

Barcelona vann samanlagt 10-2 gegn Wolfsburg og 8-2 gegn Chelsea eftir stórsigra bæði heima og úti.

Liðið trónir þá á toppi spænsku deildarinnar með sex stiga forystu á Real Madrid fyrir lokaumferðina. Barca er með 81 stig eftir 29 umferðir, en til samanburðar þá endaði Arsenal í öðru sæti á Englandi - langt á eftir toppliði Chelsea með 48 stig úr 22 leikjum.

Arsenal liðið er þó gríðarlega sterkt og getur sigrað sterka andstæðinga á sínum degi. Mariona Caldentey er besti leikmaður liðsins og var hún valin sem leikmaður ársins í kosningu áhorfenda í ensku ofurdeildinni.

Caldentey skoraði níu mörk og gaf fimm stoðsendingar á ofurdeildartímabilinu en hún lék fyrir Barcelona áður en hún skipti yfir til Arsenal.

Arsenal tók á móti Manchester United í lokaumferð ofurdeildartímabilsins á dögunum. Liðin áttust þar við í úrslitaleik um annað sæti deildarinnar og hafði Arsenal betur eftir sjö marka leik, lokatölur 4-3.

„Arsenal átti að vera búið að jarða þennan leik í 4-1," sagði Rachel Brown-Finnish, fyrrum landsliðsmarkvörður Englands og núverandi fótboltasérfræðingur hjá BBC, eftir sigur Arsenal gegn Man Utd.

„Þær vita vonandi að ef þær spila svona gegn Barcelona þá verður þeim refsað fyrir það."