„Hörkuleikur, tvö góð lið. Þetta var kaflaskiptur leikur, bæði lið vildu sigurinn mikið. Heilt yfir held ég að jafntefli væri sanngjörn niðurstaða.“ sagði Srdjan Tufegdzic, þjálfari Vals, eftir 2-1 tap gegn Stjörnunni í kvöld.
Lestu um leikinn: Valur 1 - 2 Stjarnan
Hvað þurfti Valur að gera til þess að fá allaveganna eitthvað út úr þessum leik í kvöld?
„Við hefðum átt að nýta eitthvað af þeim færum sem við fáum. Við fáum góð færi og góðar stöður sem fór beint í horn eða framhjá. Eina sem ég var ósáttur með í dag var hvernig við fáum mörkin á okkur. Svolítið barnaleg mörk og við gáfum þeim forskot hérna strax. Heilt yfir lögðu menn mikla vinnu í þetta. Markið var í loftinu seinustu 20 mínúturnar til þess að jafna leikinn en þetta datt ekki alveg okkar meginn í dag.“
Var frammistaða Vals betri í dag en í seinasta leik í 2-1 tapi gegn Fram?
„Já ég myndi segja það. Þetta var skref fram á við í dag og meiri ákæfð í liðinu. Margir hlutir sem við vorum að æfa í vikunni sem voru heilt yfir að ganga vel. Það voru margar breytingar á liðinu líka. Þeir fengu margar hornspyrnur og tækifæri sem við erum ekki vanir að fá á okkur en þetta eru hlutir sem fylgja því að gera breytingar í markvarðarstöðunni á í varnarlínunni. Heilt yfir margt jákvætt sem við tökum úr leiknum þrátt fyrir tap.“
Seinustu vikur á Hlíðarenda hafa ekki alveg gengið nógu vel, búnir að missa toppsætið og menn í meiðsli, hvernig metur Túfa stöðuna og gengi liðsins?
„Staðan er þannig að eftir leiki dagsins erum við í 2. sætinu og 5 leikir eftir af úrslitakeppninni sem við ætlum að leggja allt í til að berjast um titilinn eins og planið var frá leik eitt. Undanfarnar vikur hefur verið mikið mótlæti og ekki fyrsta skiptið í sumar. Eins og segi við strákana að þá taka alvöru menn mótlætið á kassann og gefa enn meira í þetta. Mér fannst mínir menn gera það hérna í dag.“
Túfa hefur ekki áhyggjur af stöðunni þótt þetta sé ekki alveg að ganga núna.
„Þú vilt vinna leiki og meira en allt. Ef einhver vill vinna leiki mikið að þá er það ég. Maður er að fara að sofa og vakna á hverjum degi að vilja gera vel og vinna titilinn, það verður ekkert breytt í þessum síðustu fimm leikjum.“
Viðtalið við Túfa má sjá í heild sinni í spilaranum hér að ofan
Athugasemdir
