Football365 setti saman lista yfir tíu bestu viðskipti enskra úrvalsdeildarliða þegar kemur að leikmönnum á frjálsri sölu, mönnum sem ekki voru keyptir frá öðrum félögum.
10) Demba Ba (Newcastle) - Var laus frá West Ham eftir fall liðsins og hélt norður til Newcastle þar sem hann skoraði 29 mörk í 54 leikjum.
9) Marc Albrighton (Leicester) - Var inn og út úr liði Aston Villa en með Leicester vann hann Englandsmeistaratitilinn.
8) Ruud Gullit (Chelsea) - Það voru efasemdir þegar Chelsea fékk þennan 32 ára leikmann en hann átti eftir að enda í öðru sæti á eftir Eric Cantona í kjöri á leikmanni tímabilsins.
7) Gary McAllister (Liverpool) - Margir ráku upp stór augu þegar þessi þá 35 ára leikmaður var fenginn til Liverpool. Hann skoraði bæði í undanúrslitum og úrslitum Evrópukeppni bikarhafa þegar Liverpool vann keppnina 2001.
6) Michael Ballack (Chelsea) - Þjóðverjinn reyndist Chelsea gríðarlega vel og hélt miklum stöðugleika í sínum leik. Vann fjóra stóra titla með félaginu.
5) Zlatan Ibrahimovic (Manchester United) - Breytti miklu innan og utan vallar hjá United. Elsti leikmaður sem hefur skorað yfir 15 mörk á einu tímabili í ensku úrvalsdeildinni, hann skoraði 17 á 35 ára afmælisári sínu.
4) Jay-Jay Okocha (Bolton) - Gjörbreytti Bolton með gríðarlegum fótboltahæfileikum sínum. Okocha á sér marga aðdáendur og í raun magnað að hann hafi spilað fyrir Bolton.
3) Brad Friedel (Blackburn) - Kom til Blackburn frá Liverpool og spilaði svo átta ár hjá félaginu. Þessi trausti bandaríski markvörður lyfti deildabikarnum með Blackburn 2002.
2) James Milner (Liverpool) - Hefur reynst Liverpool ótrúlega drjúgur og leyst mörg hlutverk af miklum myndarskap. Þá hefur hann sýnt leiðtogahæfileika sína.
1) Sol Campbell (Arsenal) - Það olli fjaðrafoki þegar Campbell færði sig um set í London og yfirgaf Tottenham fyrir erkifjendurna í Arsenal. En þessi magnaði miðvörður átti eftir að reynast Arsenal ómetanlegur. Hann vann ensku úrvalsdeildina tvisvar og FA-bikarinn tvisvar hjá félaginu. Skoraði líka í úrslitaleik Meistaradeildarinnar.
Athugasemdir