Dwight Yorke, fyrrum sóknarmaður Aston Villa og Manchester United, hefur verið ráðinn í sitt fyrsta starf sem aðalþjálfari.
Hinn fimmtugi Yorke er tekinn við stjórnartaumunum á Macarthur FC sem leikur í efstu deild í Ástralíu og búinn að skrifa undir tveggja ára samning.
Hann tekur við af Ante Milicic sem er fyrrum landsliðsþjálfari kvennaliðs Ástralíu og náði í 33 stig úr 26 leikjum með Macarthur FC á síðustu leiktíð og rétt missti af sæti í úrslitakeppninni.
„Ég er ótrúlega spenntur fyrir mínu fyrsta starfi sem aðalþjálfari. Ég hef fylgst með áströlsku deildinni frá því að ég spilaði hérna og átta mig á þeim kröfum og skyldum sem fylgja starfinu," sagði Yorke.
„Ég hlakka mikið til áskorunarinnar og vonast til að geta bætt liðið á ölllum sviðum. Mitt markmið er að ná árangri og spila skemmtilegan fótbolta."
