Þór tryggði sér efsta sæti í riðli 2 í Kjarnafæðismótinu með stórsigri gegn KF í dag. Leikið var í Boganum.

Nikola Kristinn Stojanovic skoraði fyrsta mark leiksins eftir stundarfjórðung og var það eina markið sem var skorað í fyrri hálfleiknum.

Þór var með ungt lið í dag og voru þrír leikmenn fæddir 2004 í byrjunarliðinu. Einn þeirra, Kristófer Kristjánsson, skoraði úr vítaspyrnur á 71. mínútu.

Varamennirnir Sigfús Fannar Guðmundsson, Vilhelm Ottó Biering Ottósson og Aðalgeir Axelsson skoruðu þrjú síðustu mörkin á lokamínútum leiksins og lokatölur 5-0 fyrir Þór sem endar riðilinn með fullt hús stiga. KF er með þrjú stig og á eftir að mæta KA 2.

Þetta þýðir að KA og Þór munu mætast í úrslitaleiknum í Kjarnafæðismótinu. Ekkert nýtt þar.