Oliver á æfingu með U21 árs landsliðinu.
„Það var svekkjandi að tapa þessum leik en þetta er frábær upplifun fyrir mig að spila fyrsta landsleikinn. Þetta er eitthvað sem ég er búinn að stefna að allt mitt líf og þegar lífstíðarmarkmið næst verður maður að njóta augnabliksins. Mér fannst ég gera það nokkuð fínt þessar fáu mínútur sem ég fékk og ég er mjög þakklátur fyrir þær," sagði Oliver Sigurjónsson miðjumaður Breiðabliks sem spilaði sinn fyrsta landsleik í 3-1 tapi gegn Slóvakíu í kvöld er hann kom inná í lokin.
Lestu um leikinn: Slóvakía U21 3 - 1 Ísland
„Við vorum með leikinn alveg undir okkar stjórn þar til þeir skora og eftir það snýst leikurinn algjörlega við. Þeir skora frekar ljót mörk að mínu mati og þannig komast þeir inn í leikinn og þá verða þeir betri eftir að þeir klára. En það er eitthvað sem við verðum að halda áfram að vinna í að halda stöðugleika. Þetta var fínn leikur svosem fram að fyrsta markinu þeirra."
„Ég er mjög þakklátur fyrir að fá þessa viku með landsliðinu. Það er gaman að sjá hvernig þeir vinna, það er frábrugðið frá U21 árs liðinu. Rosalega gaman og eitthvað sem maður stefnir á áfram. Ég er aðeins búinn að fá nasaþefinn af þessu núna og þá er bara að halda áfram."
Nánar er rætt við hann í sjónvarpinu að ofan þar sem hann segir að hann fari beint til Þýskalands á reynslu eftir þessa ferð.
Athugasemdir
