Nik Chamberlain, þjálfari Þróttar.
„Það er alltaf svekkjandi að tapa en ég get ekkert sett út á leikplanið eða vinnuframlag leikmanna frá upphafi til enda. Við vissum að fyrstu 10-15 mínúturnar yrðu erfiðar en ef við kæmumst í gegnum þær yrðum við inni í leiknum,“ sagði Nik Chamberlain, þjálfari Þróttar, eftir 2-1 tap gegn Val.
Lestu um leikinn: Þróttur R. 1 - 2 Valur
Valskonur byrjuðu leikinn af krafti og höfðu skotið þrívegis í tréverkið eftir 13 mínútna leik. Nik virtist hafa rétt fyrir sér því Þrótturum tókst að halda sjó og gott betur. Áttu fínan leikkafla í fyrri hálfleik og voru nálægt því að skora mark. Þá virtist Margrét Sveinsdóttir koma boltanum yfir marklínuna en aðstoðardómarinn vildi meina að aðeins þriðjungur boltans hefði verið kominn yfir línuna og því ekki um mark að ræða. Nik vildi ekki velta sér upp úr því atviki.
„Hvort boltinn var inni eða ekki þarna í fyrri hálfleik veit ég ekki. Ég treysti aðstoðardómaranum. Hún var vel staðsett,“ sagði Nik sem var stoltur af frammistöðu síns liðs.
„Við reyndum að spila. Við héngum ekki bara til baka heldur reyndum að spila. Það er alltaf erfitt að skora tvö mörk gegn Val en við reyndum allt til loka.“
Nánar er rætt við Nik í spilaranum hér að ofan. Hann útskýrir þar meðal annars af hverju hann gerði fjórar breytingar á byrjunarliði Þróttar frá fyrstu umferð og segir Þróttara enn vera að læra inná hvora aðra eftir stuttan undirbúning saman.
Athugasemdir
