Dragan Stojanovic
„Ég kem bara aftur fram í viðtali og segi að við höfum spilað vel í dag en töpum. Við jöfnum í 1-1 en eins og oft hefur gerst í sumar þá höldum við ekki út. Keflavík er gott lið og með góða þjálfara en mér finnst að við hefðum alveg getað fengið meira út úr þessum leik.“ Sagði Dragan Stojanovic um leik síns liðs er liðið tapaði 3-1 á útivelli gegn Keflavík fyrr í dag.
Lestu um leikinn: Keflavík 3 - 1 Dalvík/Reynir
Eftir að hafa lent undir í fyrri hálfleik voru liðsmenn Dragans ekki lengi að kvitta fyrir það í upphafi síðari hálfleiks er þeir jöfnuðu á 49.mínútu. Gestunum tókst þó ekki að velgja Keflvíkingum frekar undir uggum og ekki leið að löngu þar til Keflavík endurheimti forystu sína. Bakkaði liðið um of eftir að hafa jafnað?
„Nei alls ekki en þetta gerist oft hjá liðum sem hafa verið að tapa mörgum leikjum. Þú ert að reyna að halda í allavega þetta eina stig og fellur ómeðvitað kannski neðar á völlinn. Pínu hræðsla líka mögulega við að fá á sig mark. “
Þrátt fyrir tapið er staða Dalvíkur/Reynis ekki mikið verri eftir að lið Leiknis glutraði frá sér tveggja marka forystu gegn Grindavík. Möguleikinn því sannarlega til staðar en til þess þarf að vinna leiki.
„Þessi deild er búin að spilast svolítið skringilega í sumar. Við fáum aftur tækifæri og munurinn er núna fimm stig og fjórir leikir eftir. Við eigum möguleika og við ætlum að gera eins vel og við getum með það að markmiði að halda okkur í deildinni. En við þurfum að byrja strax í næsta leik og vinna heima.“
Sagði Dragan en allt viðtalið má sjá hér að ofan
Athugasemdir
