ÍR og Njarðvík gerðu 1-1 jafntefli í 18. umferð Lengjudeildar karla í dag. Liðin mættust á ÍR-vellinum í Breiðholtinu.
Lestu um leikinn: ÍR 1 - 1 Njarðvík
Njarðvík byrjaði leikinn í dag ekki vel.
„Mér fannst við byrja leikinn alveg ömurlega. Við vorum bara algjörlega á hælunum og héldum bara að við myndum koma hingað og fá eitthvað gefins. Við vitum það allir að það er ekki neinn leikur í þessari deild sem er gefins og hvað þá hérna í Mjóddinni. Við gerðum þetta bara erfitt fyrir okkur.“
Leikurinn var opinn og það voru færi á báða bóga.
„Maður hugsaði að þetta væri leikur sem myndi ráðast á þessum litlu atriðum. Við fáum nokkur færi hér í seinni hálfleik til þess að klára þetta en inn vildi boltinn ekki. Ef þú ert ekki nægilega sharp eða nægilega klár til að fara í færið og klára það almennilega þá skorar þú ekki úr þeim. Það lýsir sér bara best markið sem þeir skora. Það kemur eitthvað klafs og boltinn skoppar þarna tvisvar þrisvar sinnum á einhverjum hausum og við erum bara á hælunum.“
„Í dag voru að mætast þessi tvö spútnik lið í þessari deild. Bæði þessi lið voru spáð tíunda og ellefta sæti af öllum sérfræðingum og liðunum í deildinni. Það að bæði þessi lið séu á þessum stað er náttúrulega bara frábært og sýnir það að við erum búnir að standa okkur vel.“
Fjórir leikir eru eftir af móti og Njarðvík er í baráttu um umspilssæti.
„Fyrir framhaldið þá eru þetta bara fjórir úrslitaleikir og við viljum halda okkur í þessum pakka klárlega. Við erum búnir að vera þarna allt tímabilið. Það er bara gott test á mína menn núna að sjá hversu sterkir mentally þeir eru fyrir þessa baráttu sem er framundan.“
Viðtalið í heild sinni má sjá í spilaranum hér að ofan.
