Spænska félagið Sevilla er búið að taka ákvörðun um að reka Argentínumanninn Jorge Sampaoli úr starfi stjóra liðsins.
Julen Lopetegui var rekinn frá Sevilla í október á síðasta ári og var Sampaoli ráðinn í hans stað. Sevilla var í 17. sæti spænsku úrvalsdeildarinnar þegar Sampaoli tók við.
Þetta var í annað sinn þar sem Sampaoli tók við liðinu. Hann stýrði því tímabilið 2016-2017 en hætti svo til að taka við argentínska landsliðinu fyrir HM í Rússlandi.
Sevilla er aðeins tveimur stigum frá falli í spænsku deildinni og er félagið búið að fá nóg. Það ætlar að skipta Sampaoli út í landsleikjahlénu og mun José Luis Mendilibar taka við.
Mendilibar er 62 ára gamall og hefur stýrt mörgum félögum á Spáni, nú síðast Alaves.
Framundan eru mikilvægir leikir hjá Sevilla og ekki síst eru það leikir gegn Manchester United í átta-liða úrslitum Evrópudeildarinnar.
Athugasemdir