Valur sótti 3 stig á Kópavogsvöll í toppslag Pepsí-deildar karla í kvöld þegar þeir unnu 3-1 sigur á Breiðablik. Ólafur Jóhannesson þjálfari Vals var kampakátur með sigurinn sem hann sagði verðskuldaðan.
Lestu um leikinn: Breiðablik 1 - 3 Valur
„Tillfinningin er mjög góð, þetta var mjög sanngjarn sigur eftir frábæran fyrri hálfleik þar sem við rúlluðum bara yfir þá. Geggjaður leikur."
Ólafur sagði að þrátt fyrir að Blikar fóru að sækja í seinni hálfleik hafði hann engar áhyggjur af sigrinum. Ólafur sagði að Breiðablik fari yfirleitt ekkert yfir miðju í fyrri hálfleik leikja sinna.
„Blikarnir þorðu svo að fara yfir miðju í seinni hálfleik. Yfirleitt þarf maður ekki að hafa áhyggjur af þeim í fyrri hálfleik, þeir fara aldrei framfyrir miðju, þeim finnst best að vera í vörn. Við vorum þreyttir en það var engin hætta þannig séð."
Eftir að hafa dottið út gegn Sheriff í undankeppni Evrópudeildarinnar sagði Ólafur að það hefði verið mikilvægt að vinna þennan leik og er hann bjartsýnn á framhaldið.
„Mér lýst bara vel á framhaldið, það er bara áfram gakk og næsti leikur við undirbúum okkur undir hann. Það var uppleggið að fara í þennan leik og vinna hann og við unnum sanngjarnan sigur. Mér fannst við bara vera betri í dag."
Ólafur vildi ekki hafa viðtalið lengra og ákvað að enda viðtalið sjálfur, eldhress með sigurinn og vildi komast inn í klefa til að fagna.
„Hvað ertu búinn að vera lengi að læra hjá Elvari, nú er viðtalið búið að vera í fimm mínútur. Þetta er gott svona, takk fyrir."
Athugasemdir