Þórarinn Ingi Valdimarsson
Þórarinn Ingi Valdimarsson, leikmaður Stjörnunnar, var hress eftir 2-0 sigur liðsins á KA á Dalvíkurvelli í Bestu deildinni í dag en hann hrósaði ungu leikmönnum í hástert.
Ísak Andri Sigurgeirsson kom Stjörnunni á bragðið með frábæru marki áður en Emil Atlason tvöfaldaði forystuna tuttugu mínútum fyrir leikslok.
Þórarinn var afar ánægður með vinnsluna á liðinu í dag og hrósaði ungu leikmönnunum.
„Ég er hrikalega sáttur. Þetta var hörkuleikur en við vörðumst hrikalega vel í dag og allt liðið á skilið heiður fyrir það að koma hingað, halda hreinu og skora tvö mörk. Ég gæti ekki verið sáttari."
„Við fundum eitthvað pláss þegar við náðum einherju spili en fórum ósjálfrátt að verja eitthvað í seinni hálfleik með 1-0, en síðan þegar við náðum að setja annað mark þá auðveldaði það okkur lífið en vinnslan á liðinu var til fyrirmyndar í dag."
„Þetta er hrikalega gaman og við erum með geggjaða blöndu í liðinu, gömlu og ungu. Þeir eru að standa sig frábærlega. Vinnan í þeim auðveldar okkur lífið töluvert," sagði hann ennfremur en viðtalið má sjá í heild sinni hér fyrir ofan.
Stjarnan er í 3. sæti deildarinnar með 14 stig, tveimur stigum á eftir KA.
Vegna tæknilegra örðuleika verður þetta eina viðtalið úr leiknum sem birtist hér á Fótbolta.net.
