Nóg er um að vera í íslenska boltanum í dag. Stöðuna í deildunum sem leikið er í í dag má sjá ásamt leikjum dagsins, neðst í fréttinni.

Sjötta umferðin í Pepsi Max-deild karla hefst með þremur leikjum. HK tekur á móti Grindavík í Kórnum. Sá leikur verður í beinni útsendingu á Stöð2Sport. Grindavík hefur safnað inn átta stigum á meðan HK er með fjögur stig.

ÍBV kemur í heimsókn á Greifavöllinn á Akureyri og mætir þar KA. ÍBV hefur náð í tvö jafntefli á heimavelli sínum en hefur enn ekki tekist að ná í stig á útivelli á tímabilinu. KA vann góðan útisigur á Stjörnunni í síðustu umferð.

Á Eimskipsvellinum í Laugardal mætast Víkingur og KR í Reykjavíkurslag. Víkingur hefur heillað marga með spilamennsku sinni en á enn eftir að vinna fyrsta sigurinn í deildinni.

Í Inkasso deildinni fær botnlið Magna lið Fram í heimsókn á Grenivík. Þetta er fyrsti leikurinn sem spilaður er á Grenivík þetta tímabilið. Magni er eins og fyrr segir á botninum, með núll stig á meðan Fram hefur fjögur stig.

Í 2. deildinni er svo leikið á Ísafirði, í Akreneshöllinni og á Húsavík. Selfoss leiðir deildina en Vestri og Völsungur geta jafnað Selfyssinga að stigum með sigrum í dag.

Í 3. deild getur KF skotist á toppinn með sigri á Skallagrím í dag. Þá mætast Sindri og Augnablik á Höfn í Hornafirði.

Í 2. deild kvenna mætast Hamrarnir og Grótta inn í Boganum á Akureyri. Bæði lið hafa þrjú stig. Hamrarnir hafa þó leikið tvo leiki á meðan Grótta hefur einungis leikið einn leik í sumar.

Í 4. deild karla er leikið í bæði A og B-riðli. Leikið er í Fagralundi, á KR-vellinum og Leiknisvellinum.