Frederik í leiknum í dag.
„Við unnum í dag, héldum hreinum og erum að fara upp í dönsku úrvalsdeildina. Það er frábært veður, stuðningsfólkið er frábært, lífið er frábært," sagði markvörðurinn Frederik Schram eftir 1-0 sigur Lyngby á Fredericia í dönsku B-deildinni í dag.
Lyngby tryggði sig upp í deild þeirra bestu í Danmörku um síðustu helgi og enduðu svo tímabilið með sigri á heimavelli á þessum sunnudegi.
Frederik er fæddur og uppalinn í Danmörku en á íslenska móður og kaus að spila fyrir íslenska landsliðið.
„Þetta tímabil var erfitt fyrir mig. Ég meiddist fjórum dögum áður en við áttum að byrja," segir Frederik en leikurinn í dag var eini deildarleikurinn sem hann spilaði á tímabilinu. Hann átti að byrja tímabilið í markinu en meiðsli komu í veg fyrir það og markvörðurinn sem kom inn gerði vel.
„Ég spilaði síðasta æfingaleikinn, við vorum að vinna 1-0 og ég varði víti. Ég hlakkaði til að spila... því miður eru meiðsli hluti af leiknum. Það sem er mikilvægast er að við erum að fara saman upp sem lið."
Hann segist ekki vita hvort hann verði áfram með Lyngby. „Ég hlakka til að fara í sumarfrí."
Frederik talaði íslensku í viðtalinu. „Hvað finnst þér? Stundum er erfitt að skilja allt. Ég skil fótboltatungumál. Ég tala við afa minn sem býr í Reykjavík, við tölum stundum í símann. Ég þarf að tala meiri íslensku og þá kemur þetta."
Viðtalið er í heild sinni hér að ofan. Þar ræðir Frederik um íslenska landsliðið í lokin.
Athugasemdir
