Sölvi Geir Ottesen, þjálfari Víkings, var ánægður með stigin þrjú á Víkingsvelli í kvöld eftir krefjandi viðureign við nýliðana frá Mosfellsbæ. Þeir fóru með 2-1 sigur af hólmi og skoruðu sigurmark á síðustu 10 mínútum leiksins.
„Ég er hrikalega ánægður. Þetta var erfitt. Afturelding eru bara 'solid' varnarlega. Þeir eru alltaf tilbúnir að berjast með kjafti og klóm. Hins vegar var ég ekki sáttur með gæðin okkar á síðasta þriðjungi vallarins. Hins vegar lagaðist það í seinni hálfleik. Við skoruðum tvö góð mörk í seinni hálfleiknum og vorum óheppnir að missa Matta útaf. Þá varð þetta var meira spennandi."
Lestu um leikinn: Víkingur R. 2 - 1 Afturelding
Nikolaj Hansen, framherji Víkings, gerði tvö mörk fyrir þá í kvöld og virðist vera að detta í gang og gæti það reynst Víkingi mjög dýrmætt.
„Það er mjög dýrmætt að fá hann inn 100%. Hann er okkar númer eitt nía og okkar markaskorari. Okkur hefur svolítið vantað alvöru markaskorara og bara gott að Nikolaj sé kominn í stand. Hann er auðvitað bara gammur inn í teignum, þannig að ég er virkilega sáttur að fá hann í gang."
Víkingar hafa verið orðaðir við Óskar Borgþórsson, leikmann Sogndal í Noregi, að undanförnu en aðspurður út í það vildi Sölvi lítið tjá sig.
„Nei, ég get svo sem ekkert sagt um það. Bara "no comment" þangað til það kemur eitthvað annað í ljós."
Viðtalið í heild sinni má nálgast í spilaranum að ofan.
