Það er hægt að lofa því að þetta lið mun skora mörk. Elín Metta Jensen, markahæsti leikmaður deildarinnar er frammi með Hörpu Þorsteinsdóttir. Báðar skoruðu þær tvö mörk í þessari umferð og eru í íslenska landsliðinu. Fyrir aftan þær er önnur landsliðskona, Sandra María Jessen úr Þór/KA.

Þess má geta að Elín Metta hefur verið í liði umferðarinnar fimm sinnum af sjö mögulegum skiptum. Það er magnað og sýnir hversu öflugt sumar hún er að eiga.

Sandra María fór fyrir liði Þórs/KA sem sigraði Breiðablik 2-0 í toppslag. Lillý Rut Hlynsdóttir var maður leiksins þar og Hulda Björg Hannesdóttir stóð sig vel í hægri bakverðinum og hélt Öglu Maríu Albertsdóttur niðri.

Halldór Jón Sigurðsson, Donni, þjálfari Þórs/KA er þjálfari umferðarinnar eftir sigurinn á Breiðablik. Þetta er í annað sinn sem Donni hlýtur þessa viðurkenningu.

Valur vann 4-2 sigur á FH á erfiðum útivelli. Ásamt Elínu Mettu komast Málfríður Erna Sigurðardóttir og hin bráðefnilega Hlín Eiríksdóttir í lið umferðarinnar. Úr 4-2 sigri Stjörnunnar á KR kemst Þórdís Hrönn Sigfúsdóttir í lið umferðarinnar ásamt Hörpu Þorsteinsdóttur.

Þá vann Selfoss 3-0 sigur á HK/Víkingi í nýliðslag. Magdalena Anna Reimus og Karitas Tómasdóttir stóðu sig vel þar.

Grindavík gerði 1-1 jafntefli í Vestmannaeyjum. Þar var markvörðurinn Viviane Holzel Domingues maður leiksins.

Fyrri lið umferðar:
Lið 1. umferðar
Lið 2. umferðar
Lið 3. umferðar
Lið 4. umferðar
Lið 5. umferðar
Lið 6. umferðar