Pulisic er aðeins 20 ára gamall en hefur þrátt fyrir það leikið 107 leiki og gert 15 mörk fyrir félagið.

Hann hefur náð þeim áfanga að vera yngsti erlendi leikmaðurinn til að skora í þýsku deildinni.

Bandaríski landsliðsmaðurinn hefur átt gott ár en það varð enn betra er hann var gerður að fyrirliða gegn ítalska landsliðinu í kvöld.

Hann hafði spilað 22 landsleiki og skorað 9 mörk fyrir leikinn í kvöld en hann er yngsti fyrirliði í sögu bandaríska landsliðsins.

Landon Donovan var 22 ára er hann var óvænt gerður að fyrirliða í fjarveru Claudio Reyna árið 2004.

Pulisic hefur verið orðaður við Chelsea og Liverpool síðustu daga en Dortmund hefur útilokað að hann fari frá félaginu á þessu tímabili.