Haddi var ánægður með frammistöðuna en mjög svekktur að fá ekki víti í stöðunni 2-2.
KA hefði hæglega getað skorað fleiri mörk í leiknum í dag.
„Við áttum bara skilið að vinna leikinn. Þrátt fyrir að hafa fengið þrjú mörk á okkur þá áttum við að vinna. Ég hefði verið hundsvekktur með jafntefli því að við erum bara með þá, fáum þrjú færi í seinni hálfleik einn á móti markmanni sem okkur tekst bara ekki að skora úr. Skjótum beint í lappirnar á markmanninum. Svo eigum við að fá 100% víti í seinni hálfleik, en því miður þá klikkuðu allir dómararnir þar og þeir skora í næstu sókn," sagði svekktur Hallgrímur Jónasson, þjálfari KA, eftir tap gegn Breiðabliki í 21. umferð Bestu deildarinnar í kvöld.
Tap KA og sigur Stjörnunnar gegn FH þýðir að KA á ekki lengur möguleika á sæti í efri hluta deildarinnar þegar hún tvískiptist eftir næstu umferð.
Tap KA og sigur Stjörnunnar gegn FH þýðir að KA á ekki lengur möguleika á sæti í efri hluta deildarinnar þegar hún tvískiptist eftir næstu umferð.
Lestu um leikinn: KA 2 - 3 Breiðablik
„Nei, ég get ekki skilið hvernig það er ekki dæmt víti. Það eru fjórir dómarar sem horfa á þetta. Það er varnarmaður sem ætlar að negla boltanum langt í burtu. Ég heyrði dynkinn til mín, hann neglir í Viðar. Þegar þjálfari Breiðabliks er búinn að sjá þetta á vídeói og segir að hann negli hann niður, þá held ég að sé nokkuð augljóst að þetta sé víti. Ég skil ekki af hverju það er ekki dæmt."
„Ef þjálfari hins liðsins segist vera búinn að sjá þetta á upptöku og segir að þetta sé víti, þá held ég að þetta sé 100% víti," segir Haddi sem var búinn að ræða við sinn fyrrum aðstoðarmann, Eið Ben Eiríksson, sem er í þjálfarateymi Breiðabliks.
„Ég nenni ekki að kommenta á það (dómgæsluna heilt yfir) en mér fannst þetta vera risa augnablik sem mér finnst rosa slæmt að þeir hafi misst af. Ef við fáum víti og skorum þá erum við 3-2 yfir en í staðinn fara þeir upp og skora mark. Það svíður mikið. Dómarinn gerir sitt besta, en ég er svekktur að hann og allir sem eru með honum hafi misst af þessu atriði, því þetta er 100% víti."
„Við breytum þessu ekki, en það sem ég tek með mér er að frammistaðan var frábær. Við hefðum getað skorað svona 6-7 mörk. En því miður fáum við á okkur þrjú og skorum bara tvö. Við förum svekktir heim með niðurstöðuna, en erum með kassann á lofti með frammistöðuna því hún var frábær. Breiðablik er efst í deildinni, hörkulið, en við áttum skilið sigurinn í dag."
„Þetta er kannski besta frammistaðan okkar í langan tíma, og á góðum degi hefðum við skorað sjö mörk og það hefði svo sannarlega dugað í dag."
„Ef topp sex er farið þá bara tökum við Skagann í næsta leik og verðum svo bikarmeistarar, þá gæti okkur ekki verið meira sama um það," sagði Haddi sem ræddi nánar um leikinn og viðsnúning KA í sumar í viðtalinu sem má nálgast í spilaranum efst.
Athugasemdir
