Hannes Þór Halldórsson
Hannes Þór Halldórsson, markvörður íslenska landsliðsins, var jafn svekktur og aðrir leikmenn landsliðsins eftir 1-0 tapið gegn Finnlandi í undankeppni HM í dag.
Lestu um leikinn: Ísland 0 - 1 Finnland
„Við erum í rusli yfir því að hafa ekki unnið í dag. Við hittum kannski ekki á okkar besta dag eða fórum illa af stað og hafði samt tilfinninguna að þetta væri bara off dagur hjá okkur en við náðum engu að síður að kreista út nóg af færum til þess að koma okkur inn í þennan leik og vinna síðan," sagði Hannes við Fótbolta.net.
Eina mark leiksins kom úr aukaspyrnu snemma leiks en boltinn fór í slá og inn.
„Þetta féll ekki með okkur í dag því miður og við ætluðum okkur stærri hluti og þetta gerir leiðina aðeins erfiðari að markmiðum okkur en núna er ekkert annað en að klára þetta á þriðjudaginn og halda ótrauðir áfram."
Hannes talaði um það að hann hafði það á tilfinningunni að þetta væri dagur þar sem hlutirnir myndu einfaldlega ekki ganga upp en hann útskýrði það nánar.
„Ég veit það ekki. Það er erfitt að segja, það var ekki til í dæminu að það væri vanmat. Við vissum nákvæmlega að þó svo við værum í betri stöðu í riðlinum og hefðum staðið okkur vel upp á síðkastið að það væri ekki það mikill gæðamunur á liðunum að við getum labbað yfir þá á útivelli, það var augljóst mál."
„Það er alltaf hægt að lenda í því að hlutirnir ganga ekki upp og það gerðist í dag. Þeir klíndu honum af 30 metra færi í slána og inn, draumaskot. Þeir voru að henda sér fyrir okkar skot og við vorum ekki að nýta sénsana okkar, það er grátleg og það er ekkert annað en að sætta sig við það og gera betur næst."
Leikmenn lögðu allt í sölurnar í dag og menn ýttu línunni upp seinnia hluta leiks en það gekk þó ekkert upp og niðurstaðan tap.
„Það er leiðinlegt að vera með afsakanir en það gáfu allir allt í þetta og við reyndum allt sem við gátum og það því miður gekk ekki. Þetta er einn af þessum dögum, stöngin út eins og þú segir."
„Þetta er ekkert mál fyrir mig. Þetta tekur ekkert það mikinn líkamlegan toll, þó ég hafi verið lúmskt þreyttur eftir leikinn í dag en ég hef meiri áhyggjur af strákunum, margir orðnir ansi þreyttir en við erum með gott sjúkrateymi og nú verður allt gert til að hlaða batteríin," sagði hann ennfremur.
Hægt er að sjá viðtalið í heild sinni hér fyrir ofan.
Athugasemdir
