Icardi skrifaði undir nýjan samning við Inter áður en félagið lánaði hann, til að koma í veg fyrir að geta misst hann á frjálsri sölu ef PSG nýtir sér ekki kaupréttinn.

Sky Sport Italia segir að Icardi sé lánaður fyrir 5 milljónir evra auk þess sem PSG greiði 7 milljónir í bónusgreiðslur og geti keypt leikmanninn fyrir 65 milljónir næsta sumar.

Icardi mætti til Parísar í læknisskoðun í morgun en með í för var eiginkona hans og umboðsmaður, Wanda Nara.

Icardi hefur skorað 121 mark í 219 leikjum í ítölsku A-deildinni en samband hans við Inter eyðilagðist fyrir um sex mánuðum. Hann var sviptur fyrirliðabandinu og hætti skyndilega að æfa með félaginu.

Eftir tímabilið fékk Icardi þau skilaboð að hann væri ekki í áætlunum félagsins.