Cecilía hélt hreinu í fyrstu umferð deildarinnar
Cecilía Rán Rúnarsdóttir hélt hreinu er Inter gjörsigraði nýliða Ternana, 5-0, í 1. umferð Seríu A á Ítalíu í dag.
Landsliðskonan var besti markvörður deildarinnar á síðasta tímabili og hélt hreinu tíu sinnum.
Hún tók upp þráðinn þar sem frá var horfið og hélt örugglega hreinu gegn Ternana. Tvisvar sinnum reyndu gestirnir á Cecilíu, en í bæði skiptin varði hún frábærlega.
Karólína Lea Vilhjálmsdóttir var ekki með Inter í leiknum.
Alexandra Jóhannsdóttir og Elísa Lana Sigurjónsdóttir komu báðar inn af bekknum í 2-1 sigri Kristianstad á Vittsjö í sænsku úrvalsdeildinni.
Kristianstad er í 5. sæti með 37 stig.
Andrea Þórisson byrjaði hjá Bollstanas sem tapaði fyrir Örebrö, 3-0, í B-deildinni. Bollstanas er í næst neðsta sæti með 15 stig.
Glódís Perla Viggósdóttir kom inn af bekknum hjá Bayern München sem vann öruggan 4-0 sigur á Werder Bremen í þýsku deildinni. Bayern er í öðru sæti með 13 stig eftir fimm leiki.
Amanda Andradóttir spilaði þá síðustu mínúturnar í 3-1 sigri Twente á PSV í hollensku úrvalsdeildinni. Twente er á toppnum með fullt hús stiga eftir fjórar umferðir.
Athugasemdir
