Danski sóknarmaðurinn Rasmus Höjlund skoraði bæði mörk Napoli er liðið lagði Sporting að velli, 2-1, í Meistaradeild Evrópu í gær, en þetta er eitthvað sem Höjlund gat ómögulega spáð fyrir um.
Höjlund gekk í raðir Napoli á láni frá Manchester United í sumar og þá kom Kevin De Bruyne á frjálsri sölu frá nágrönnum United í Manchester City.
De Bruyne lagði upp bæði mörkin fyrir Höjlund í leiknum er Napoli vann sinn fyrsta Meistaradeildarleik á tímabilinu.
„Höjlund skoraði tvö mörk í Meistaradeildinni eftir tvær stoðsendingar frá Kevin De Bruyne er ekki eitthvað sem var á bingóspjaldinu mínu fyrir árið 2025,“ skrifaði Höjlund á Instagram.
Daninn hefur skorað þrjú mörk í fyrstu fimm leikjum sínum með liðinu og líður greinilega vel í Napolí eftir vonbrigðatíma í Manchester.
Athugasemdir
