Spánn: Celta tókst ekki að sigra tíu leikmenn Cádiz

Celta Vigo tók á móti Cadiz í eina leik kvöldsins í efstu deild spænska boltans og náðu gestirnir forystunni á 16. mínútu. Chris Ramos skallaði þá stórkostlega fyrirgjöf frá Ivan Alejo í netið.

Það leið þó ekki á löngu þar til miðvörðurinn Victor Chust fékk að líta beint rautt spjald í liði gestanna fyrir að ræna upplögðu marktækifæri af andstæðingi sínum.

Ellefu heimamenn voru talsvert sterkari aðilinn á vellinum og tókst þeim að jafna leikinn snemma í síðari hálfleik, þegar norski sóknarmaðurinn Jörgen Strand Larsen skoraði eftir laglega sókn.

Það var aðeins eitt lið á vellinum á lokakafla leiksins en gestunum frá Cádiz tókst að halda út og tryggja sér stig í fallbaráttunni.

Celta er áfram í fallsæti eftir þetta jafntefli, með 9 stig úr 15 leikjum. Cádiz er með 12 stig.