Dagur Dan Þórhallsson var að ljúka flottum sigurleik með CF Montréal í MLS deildinni rétt í þessu, þar sem kanadíska liðið vann frábæran sigur á útivelli gegn New York City FC.

Dagur lék allan leikinn sem hægri vængbakvörður og urðu lokatölur 0-3 eftir vítaspyrnumark frá Prince-Osei Owusu og tvennu frá Wikelman Carmona.

Matty Longstaff, fyrrum leikmaður Newcastle United, var í byrjunarliði Montréal og léku þeir á móti Emil Forsberg sem var í byrjunarliði New York.

Montréal er með þrjú stig eftir þrjár fyrstu umferðirnar á nýju tímabili í MLS. New York er með sex stig.

Sveinn Aron Guðjohnsen lék þá næstum allan leikinn í sigri Cavese gegn Picerno í C-deildinni á Ítalíu. Sveini Aroni var skipt af velli á 91. mínútu í stöðunni 1-0 og innsiglaði varamaðurinn sem kom inn í hans stað sigurinn skömmu síðar, lokatölur 2-0.

Cavese er um miðja C-deild, þremur stigum fyrir ofan fallsvæðið og sex stigum frá umspilssæti.

Í danska bikarnum varði Elías Rafn Ólafsson mark FC Midtjylland er liðið tryggði sér sigur í undanúrslitum gegn AGF Århus. Elías varði fjórar af fimm marktilraunum sem rötuðu á rammann.

Lokatölur urðu 1-1 á heimavelli Midtjylland eftir nauman sigur í fyrri leiknum í Árósum. Tómas Óli Kristjánsson var ónotaður varamaður í liði AGF. Midtjylland mætir FC Kaupmannahöfn í úrslitaleik bikarsins.

Logi Tómasson lék þá allan leikinn í vinstri bakvarðarstöðunni hjá Samsunspor sem tapaði naumlega gegn stórveldi Fenerbahce í efstu deild í Tyrklandi.

Samsunspor náði forystunni í tvígang á erfiðum útivelli og lagði Logi seinna mark liðsins upp fyrir Marius, sem skoraði tvennu. Samsunspor leiddi 1-2 í leikhlé en tókst ekki að stöðva dramatíska endurkomu á lokamínútunum.

Marco Asensio lagði upp mörk á 90. og 95. mínútu til að snúa dæminu við og stela sigri fyrir heimamenn í risaveldi Fenerbahce.

Logi og félagar eru án sigurs í síðustu fimm deildarleikjum í röð og sigla lygnan sjó í efri hluta deildarinnar, tíu stigum frá evrópubaráttunni.

Þetta er gríðarlega dýrmætur sigur fyrir Fenerbahce sem er fjórum stigum á eftir Galatasaray í titilbaráttunni.

Í Hollandi sat Willum Þór Willumsson allan leikinn á bekknum í þægilegum sigri NEC Nijmegen sem er í harðri baráttu um meistaradeildarsæti, á meðan Hinrik Harðarson var í byrjunarliðinu í sigri Odd í æfingaleik gegn Inter Turku og Júlíus Mar Júlíusson byrjaði í jafntefli Kristiansund gegn Ranheim.

New York City 0 - 3 Montreal

Cavese 2 - 0 Picerno

Midtjylland 1 - 1 AGF

Fenerbahce 3 - 2 Samsunspor

Nijmegen 3 - 0 Volendam

Odd 1 - 0 Inter Turku

Kristiansund 1 - 1 Ranheim