Rúnar Þór Sigurgeirsson, leikmaður Keflavíkur, hefur verið úrskurðaður í eins leiks bann vegna sjö áminninga í Bestu deildinni.
Sjöundu áminningu sína fékk Rúnar í leik ÍBV og Keflavíkur. Í ljós kom að áminning Rúnars á 67. mínútu hafði ekki verið skráð í skýrslu leiksins.
Dómari leiksins og aga- og úrskurðarnefnd KSÍ hafa nú staðfest að Rúnar fékk gult spjald og hefur leikskýrslu því verið breytt til samræmis.
Rúnar verður því í leikbanni á mánudag þegar Keflavík heimsækir Leikni í Breiðholtinu. Samherji hans, miðjumaðurinn Ernir Bjarnason, tekur einnig út bann í þeim leik vegna uppsafnaðra áminninga.
Keflavík er í sjöunda sæti Bestu deildarinnar en Leiknir er í fallsæti, því ellefta.
Athugasemdir