Yngvi fagnar þriðja marki sínu í dag.
Yngvi Borgþórsson og Tryggvi Guðmundsson ræddu við Fótbolta.net eftir að hafa spilað með ÍBV í styrktarleik Abel Dhaira markmanns ÍBV sem glímir við krabbamein. Yngvi skoraði öll þrjú mörk ÍBV í 3-3 jafntefli en úrvalslið Pepsi-deildarinnar vann svo í vítaspyrnukeppni.
„Hann hefur ekki einu sinni skorað þrennu á skotæfingu," segir Tryggvi og Yngvi svarar: „Nei, og er orðinn 41 árs!"
Yngvi er orðinn þjálfari Einherja á Vopnafirði og nú þegar markaskorunin er komin á fullt er ljóst að enginn fer á mis við það í sumar.
„Þeir sömdu við mig sem leikmann og þjálfara," útskýrir Yngvi og þarna blanda sér í umræðuna Magnús Gylfason og Heimir Hallgrímsson landsliðsþjálfari. Maggi sagði að Yngvi hafi aldrei skorað 3 fyrir ÍBV fyrr en hann var orðinn Einherja leikmaður og Heimir svaraði:
„Hann hækkaði bara mjög mikið í verðgildi í þessum leik."
Tryggvi sem sjálfur er mjög markagráðugur vildi þó kvarta undan Yngva: „Hann var svolítið eigingjarn. Ég legg upp fyrsta markið, svo kemur kross þar sem ég er mættur á fjær eins og menn vita og segi honum að láta hann fara, en nei nei," sagði Tryggvi og Yngvi viðurkenndi að hafa verið gráðugur í dag.
Fyrsta markið var reyndar einkar skemmtilegt að hætti Messi og Suarez því Tryggvi tók vítaspyrnu og gaf á Yngva úr henni sem skoraði. En afhverju gaf hann?
„Því ég sá einhvern veginn skrifað í skýin að með þessu myndi ég koma af stað markaahrinu hjá Yngva. Þetta er eins og tómatsósu effectið, þetta kemur ekki lengi en loksins þegar það kemur..."
Viðtalið má sjá í sjónvarpinu að ofan.
Fjársöfnun fyrir Abel
ÍBV er með fjársöfnun fyrir Abel. Þeir sem vilja taka þátt í söfnuninni geta hringt í neðangreind númer eða lagt beint inn á söfnunarreikning 582-14-602628 kt. 680197-2029.
9071010 – 1000kr
9071020 – 2000kr
9071030 – 3000kr
Athugasemdir
