Birmingham sótti góðan útisigur til Bristol í Championship-deildinni á Englandi í kvöld.

Jamie Paterson skoraði aðeins eftir 43 sekúndur og kom Bristol City yfir, en Birmingham náði að jafna sig af þeirri slæmu byrjun.

Scott Hogan, sem er í láni frá erkifjendunum í Aston Villa, jafnaði á 23. mínútu og komst Birmingham svo yfir með sjálfsmarki sjö mínútum síðar.

Staðan var 2-1 í hálfleik og nánast allan síðari hálfleikinn líka. Lucas Jutkiewicz innsiglaði sigur Birmingham í uppbótartíma.

Birmingham fer með þessum frekar óvænta sigri upp í 14. sæti. Bristol City er í sjötta sæti sem gefur þáttökurétt í umspili um sæti í ensku úrvalsdeildinni.