Gareth Bale, leikmaður Real Madrid, kaus að ferðast ekki með liðinu til Manchester fyrir leikinn gegn Manchester City í 16-liða úrslitum Meistaradeildar Evrópu.
Zinedine Zidane, þjálfari liðsins, greindi frá því í gær að Bale vildi ekki spila gegn City en nú hefur það komið fram að ástæðan sé sú að Bale hafi verið fullviss um að hann fengi ekkert að spila í leiknum.
Samræður á milli Zidane og Bale og sú staðreynd að Bale hafi ekki spilað eina einustu mínútu í síðustu sjö leikjum Real Madrid í deildinni, gerði honum ljóst fyrir að hann fengi ekkert að spila.
Bale sást spila golf fyrr í dag og voru spænskir fjölmiðlar fljótir að ná mynd af honum og fjalla um það að hann væri í golfi örfáum klukkustundum fyrir leikinn mikilvæga.
Manchester City og Real Madrid mætast í kvöld klukkan 19 en City vann fyrri leik liðanna 2-1 á Spáni. Sergio Ramos er í leikbanni hjá spænsku meisturunum.
Athugasemdir
