England: Abraham og Pulisic tryggðu sjötta sigurinn í röð

Chelsea fékk Crystal Palace í heimsókn í fyrsta leik dagsins í ensku úrvalsdeildinni og stjórnuðu heimamenn gangi mála frá fyrstu mínútu.

Gestirnir áttu ekki eina einustu marktilraun í fyrri hálfleik og kom Tammy Abraham þeim bláklæddu yfir í upphafi síðari hálfleiks. Willian gaf þá frábæra sendingu innfyrir vörnina og á Abraham sem skoraði af stuttu færi.

Þegar tók að líða á leikinn þurftu gestirnir að opna sig meira og náði Chelsea að tvöfalda forystuna eftir skyndisókn. Christian Pulisic skallaði boltann þá í netið eftir að skot Michy Batshuayi fór af varnarmanni og upp í loft.

Meira var ekki skorað í leiknum og fyllilega verðskuldaður sigur Chelsea staðreynd. Þetta var sjötti sigur liðsins í röð í deildinni.

Chelsea er í öðru sæti eftir sigurinn, einu stigi fyrir ofan Englandsmeistara Manchester City sem eiga leik til góða gegn toppliði Liverpool á morgun.

Crystal Palace er áfram um miðja deild, með 15 stig eftir 12 umferðir.