Sara Björk Gunnarsdóttir, landsliðsfyrirliði, var sátt eftir 5-0 sigur á Færeyjum á útivelli í undankeppni HM í dag.
Lestu um leikinn: Færeyjar 0 - 5 Ísland
„Við erum sáttar, kannski ekki með alla frammistöðuna í leiknum en með sigur og fimm mörk," sagði Sara eftir leikinn.
Þrátt fyrir að leikurinn hafi endað 5-0 var hann langt frá því að vera gallalaus, sérstaklega var fyrri hálfleikurinn ekki nægilega góður.
„Fyrri hálfleikurinn var skelfilegur á köflum en við rifum okkur upp og komum sterkari í seinni hálfleikinn."
Ísland er í öðru sæti riðils síns, tveimur stigum á eftir Þýskalandi. Ísland á leik til góða á Þýskaland. Framundan í sumar og haust eru heimaleikir gegn Slóveníu, Þýskalandi og Tékklandi. Þessir leikir munu skera úr um það hvort Ísland fer á HM eða ekki en möguleikinn er klárlega til staðar og hefur sjaldan ef aldrei verið betri.
„Þetta lítur vel út, við eigum þrjá heimaleiki eftir og það er sterkur kostur fyrir okkur. Við ætlum að fylla Laugardalsvöllinn. Við erum gífurlega spenntar stelpurnar að spila heima," sagði Sara að lokum.
Viðtalið í heild sinni er hér að ofan.
Athugasemdir
