Skyldusigur og Guðjohnsen á Guðjohnsen

Ísland vann sigur á virkilega slöku liði Liechtenstein á Laugardalsvelli í kvöld.

Það hefði í raun mikið þurft að gerast svo að Ísland myndi ekki vinna þennan leik; svo slakt var lið Liechtenstein.

Skagamaðurinn Stefán Teitur Þórðarson kom Íslandi á bragðið með skallamarki eftir stórkostlega sendingu frá Jóni Degi Þorsteinssyni. Albert Guðmundsson bætti svo við marki úr vítaspyrnu fyrir leikhlé.

Albert gerði sitt annað mark úr vítaspyrnu á 79. mínútu. Hann var mjög öruggur í bæði skiptin. Sveinn Aron Guðjohnsen kom inn á sem varamaður og fiskaði seinni vítaspyrnu Íslands.

Það var svo risastórt augnablik í Laugardalnum á 88. mínútu þegar Sveinn Aron lagði upp fyrir yngri bróður sinn, Andra Lucas. Andri kom inn á sem varamaður nokkrum mínútum áður; hans annað landsliðsmark. Þetta er augnablik sem verður örugglega minnst einhvern tímann á næstu árum.

Ekki alveg frammistaða upp á tíu hjá íslenska liðinu, en góður sigur samt sem áður og úrslitin ásættanleg.

Ísland er núna með átta stig í riðlinum í næst neðsta sæti. Liechtenstein er á botni riðilsins.