Cristiano Ronaldo gaf kost á sér í viðtal eftir 0-2 sigur Juventus gegn Bayer Leverkusen í lokaumferð riðlakeppni Meistaradeildarinnar í gær. Juve var búið að vinna D-riðilinn fyrir upphafsflautið.
Að leikslokum var Ronaldo spurður hvort hann væri til í að mæta fyrrum liðsfélögum sínum í Real Madrid í 16-liða úrslitum. Real endaði í öðru sæti A-riðils og getur því mætt Juve strax í næstu umferð, en dregið verður næsta mánudag.
„Real Madrid er frábært lið en ég vil ekki mæta þeim strax. Ég vil mæta þeim í úrslitaleiknum," sagði Ronaldo, sem var svo spurður út í lífið á Ítalíu og meiðslavandræði sem hafa verið að hrjá hann.
„Mér líður vel líkamlega, meiðslin eru partur af fortíðinni. Mér líður mjög vel hjá Juve og ég nýt þess í botn að spila með Dybala og Higuain."
Athugasemdir