Þorlákur Árnason, þjálfari Þórs, sá sína menn tapa stórt í Lengjudeild karla í kvöld er liðið mætti Fjölni.
Lestu um leikinn: Fjölnir 4 - 1 Þór
Þórsarar þurftu að sætta sig við 4-1 tap á útivelli í þriðju umferð þar sem Fjölnir gerði tvö mörk í fyrri hálfleik og tvö í þeim seinni.
Þorlákur segir að þetta hafi heilt yfir verið vondur dagur á skrifstofunni fyrir Þórsara í kvöld og segir sigur Fjölnis verðskuldaðan.
„Þetta eru gríðarleg vonbrigði. Við vorum bara ekki nógu fastir fyrir og grimmir og undir í baráttu, gegn góðu Fjölnisliði þá býðurðu hættunni heim. Fjölnismenn unnu sannfærandi sigur," sagði Þorlákur.
„Mér fannst við verða undir frá upphafi í baráttunni. Þeir eru með physical lið og beita mikið af löngum sendingum og við vorum undir í því. Við héldum boltanum illa í fyrri hálfleik, það komu skárri kaflar í seinni en þá gáfum við mark um leið. Þetta var bara ekki góður dagur á skrifstofunni."
„Við gerðum skiptingar en þegar þú átt svona off dag þá er erfitt þegar menn verða svona hauslausir að ná þeim til baka, það eru algjörir lykilmenn sem eiga off dag."
Nánar er rætt við Láka í meðfylgjandi viðtali.
