Madrídingar stilltu upp sínu langsterkasta liði. Kylian Mbappe þreytti frumraun sína og var með þá Rodrygo, Vinicius Junior, Rodrygo og Jude Bellingham til aðstoðar.

Rodrygo átti besta færi fyrri hálfleiksins. Það kom undir lok hálfleiksins en hann átti skot sem hafnaði í þverslá.

Atalanta byrjaði síðari hálfleikinn af krafti. Marten de Roon átti fyrirgjöf sem rataði beint á kollinn á Mario Pasalic, en Thibaut Courtois kom til bjargar á síðustu stundu.

Leikurinn opnaðist meira eftir þetta. Federico Valverde kom Real Madrid í forystu á 59. mínútu. Bellingham fann Vinicius í teignum, sem hljóp upp að endamörkum, kom boltanum fyrir markið og á Valverde sem potaði boltanum í netið.

Ellefu mínútum síðar kom fyrsta mark Mbappe fyrir Real Madrid.

Bellingham fékk boltann vinstra megin í teignum, lagði boltann fyrir Mbappe sem skoraði með góðu skoti. Frábær byrjun hjá Frakkanum.

Real Madrid fagnaði sínum sjötta Ofurbikarstitli í Evrópu en ekkert lið hefur unnið bikarinn oftar en spænska félagið.