Ítalía: Mikael átti flottan leik í markalausu jafntefli gegn lærisveinum Conte

Fallbaráttulið Venezia náði í óvænt markalaust jafntefli gegn titilbaráttuliði Napoli er liðin áttust við í Seríu A á Ítalíu í dag.

Napoli hefur spilað frábæran fótbolta undir Antonio Conte á tímabilinu en tókst ekki að nýta sér fjölmörg færi sín að marki og gátu Venezia-menn þakkað rúmenska markverðinum Ionut Radu fyrir.

Hann varði nokkur góð færi frá Scott McTominay og síðan aftur frá Romelu Lukaku á meðan Amir Rrahmani tókst að bjarga á línu hinum megin á vellinum í fyrri hálfleik.

Ekki tókst liðunum að finna netmöskvana í þetta sinn og markalaust jafntefli niðurstaðan.

Mikael Egill var með bestu mönnum Venezia með 7,2 í einkunn á FotMob en það var Radu sem tók verðlaunin sem maður leiksins með sjö vörslur og 9 í einkunn.

Bjarki Steinn Bjarkason var á bekknum hjá Venezia en kom ekki við sögu.

Napoli jafnar Inter að stigum á toppnum á meðan Venezia er áfram í næst neðsta sæti með 20 stig, fimm stigum frá öruggu sæti.