Salah er líklega í besta formi lífs síns í augnablikinu en hann á hverja góðu frammistöðuna á eftir annarri.

Hann lagði upp fyrsta markið í dag fyrir Sadio Mane, með laglegri utanfótarsendingu áður en hann gerði fjórða mark liðsins eftir að hafa fíflað varnarmenn Watford í teignum.

Klopp var virkilega hrifinn af frammistöðu Salah og hrósaði honum í hástert eftir leik.

„Þetta er gott. Það er ekki hægt að segja annað. Eftir landsleikjatörnina þá er oft erfitt að finna taktinn af því leikmenn hafa verið að spila önnur kerfi, en strákarnir voru góðir þrátt fyrir að hafa bara tekið eina æfingu. Watford var með ákveðnar hugmyndir en við leyfðum þeim ekki að spila. Mörkin voru geggjuð og það var góð orka, karakter og gott viðhorf."

„Frammistaðan hans var rosaleg í dag. Sendingin að fyrsta markinu var frábær og svo markið hans sérstakt. Hann er toppurinn og við sjáum það öll. Hver er betri en hann? Við þurfum ekki að tala um það sem Messi og Ronaldo hafa gert fyrir fótboltann. Akkúrat núna er Mo Salah bestur," sagði hann í lokin.