Ólafur Ingi á landsliðsæfingu í dag.
„Það var mikill léttir. Þetta hefur verið markmiðið og sem betur fer komst maður inn," segir Ólafur Ingi Skúlason um tilfinninguna þegar sæti hans í íslenska landsliðshópnum á HM í Rússlandi var staðfest.
„Þetta var búin að vera þokkaleg bið og maður gat ekki annað en vonað. Við erum með stóran og breiðan hóp."
„Þetta var búin að vera þokkaleg bið og maður gat ekki annað en vonað. Við erum með stóran og breiðan hóp."
Fyrir tveimur árum síðan rétt missti Ólafur Ingi af sæti í landsliðshópnum sem fór á EM.
„Beint eftir þann skell þá vissi maður ekki alveg hvar maður stæði. Sem betur fer var ég kallaður inn og náði að sýna og sanna að ég ætti heima í þessum hóp."
„Maður finnur til með þeim sem þurfa að sitja eftir með sárt ennið. Þetta er gríðarlegur skellur en lífið heldur áfram. Ég þekki báðar hliðar núna. Maður er himinlifandi að hafa slopið inn."
Það er mikil eftirvænting í íslensku þjóðinni fyrir HM en fyrsti leikur Íslands, gegn Argentínu, verður eftir 29 daga. Einnig fylgist fólk milli vonar og ótta með Gylfa og Aroni sem eru meiddir en vinna í að gera sig klára.
„Það er aðallega eftirvænting. Ég hef engar áhyggjur af strákunum. Ég held að þeir verði orðnir flottir þegar mótið byrjar. Við höfum góðan tíma til að koma öllum í eins gott stand og hægt er," segir Ólafur Ingi en viðtalið má sjá í heild í sjónvarpinu hér að ofan.
Athugasemdir
