Arnór Sigurðsson og Hörður Björgvin Magnússon voru báðir í byrjunarliði CSKA Moskvu sem vann 1-0 sigur gegn Akhmat Grozny í rússnesku úrvalsdeildinni í dag.
Eina mark leiksins skoraði Fedor Chalov úr vítaspyrnu sem hann fiskaði sjálfur.
Hörður lék allan leikinn fyrir CSKA en Arnór var tekinn af velli á 78. mínútu.
CSKA fer upp í fjórða sæti deildarinnar með þessum sigri þegar ein umferð er eftir. Þetta var annar leikurinn í næst síðstu umferðinni.
Theódór Elmar í umspilið
Theódór Elmar Bjarnason lék allan leikinn fyrir Gazisehir Gaziantep þegar liðið burstaði Kardemir Karabukspor í tyrknesku B-deildinni á þessum laugardegi.
Gazisehir komst yfir á áttundu mínútur en Karabukspor jafnaði á 11. mínútu úr vítaspyrnu. Staðan var ekki lengi jöfn því Elmar og félagar komust aftur yfir á 13. mínútu. Gazisehir bætti við þriðja marki fyrir lok fyrri hálfleiks. Í seinni hálfleiknum skoraði Gazisehir önnur þrjú mörk og átti Karabukspor engin svör.
Lokatölur 6-1 fyrir Gazisehir sem endar í fimmta sæti deildarinnar og fer því í umspil um að komast upp.
Kári Árnason var ekki í leikmannahópi Genclerbirligi sem tapaði 2-1 gegn Adana Demirspor.
Genclerbirligi er komið upp í deild þeirra bestu fyrir næstu leiktíð. Kári er væntanlega á leið til Víkings í Pepsi Max-deildinni í júlí.
Adam Örn meiddist í lokaleiknum
Í Póllandi var það að frétta að bakvörðurinn Adam Örn Arnarson fór meiddur af velli þegar lið hans Górnik Zabrze vann 3-0 sigur á Korona Kielce.
Adam fór meiddur af velli á 26. mínútu en öll mörk Górnik komu í seinni hálfleiknum. Fyrsta markið var skorað þegar tæplega 70 mínútur voru liðnar af leiknum.
Þetta var síðasti deildarleikur Górnik Zabrze á tímabilinu og endar liðið í þriðja sæti í fallriðlinum í úrslitakeppninni í Póllandi. Liðið verður því áfram í efstu deild á næsta tímabili.
Athugasemdir