Staðan var markalaus í hálfleik er Hertha Berlin fékk margfalda Þýskalandsmeistara FC Bayern í heimsókn í dag.

Bæjarar skiptu um gír eftir leikhlé og skoraði Thomas Müller fyrsta mark leiksins á 60. mínútu. Þrettán mínútum síðar var Robert Lewandowski búinn að tvöfalda forystuna með marki úr vítaspyrnu og jafnaði hann um leið Timo Werner í markaskorun. Báðir eru þeir komnir með 20 mörk í deildinni.

Thiago Alcantara og Ivan Perisic kláruðu dæmið fyrir Bayern og fjórði sigur liðsins í röð staðreynd. Bayen er komið upp í annað sæti deildarinnar, fjórum stigum eftir toppliði Leipzig.

Hertha er með 19 stig eftir 18 umferðir, tveimur stigum frá fallsvæðinu.